Salawas sibuk umpat jadi relawan pamadam kabakaran lahan, Ongol wayahini pina jarang takumpulan kawannya di pos ronda. Lantaran itu, inya ne kada tapi tahu kabar di RTnya surang, tamasuk bila ada urang basaruan.
Kamarian, pas Ongol rahatan duduk di pelataran rumah imbah magrib, lewat kawalnya yakni si Gabau lawan Lengkor, pina laju bajalan. Badua mamakai baju koko, batapih lawan bakupiah “Uii, kada singgahkah, kamana tu? jar Ongol managur kawalnya badua tu. “Anu Ngolai, kami bahancap-hancap nah. Kena ada ja lain kali,” sahut Gabau.
Pina panasaran Ongol neh. sakalinya badua tadi manuju wadah pambakal H Untat, nang maadaakan acara ba Maulud Nabi. Di rumah sidin pina hibak urang. Lantaran sidin selajur babagi bingkisan sambako, lawan amplop baisi duit.
Ongol ne kada tahu, sesaruan gasan inya rupanya disampaikan ka bininya si Aluh Lintak. Rupanya nang bini kada ingat kalo menyampaiakan lawan laki, makanya Ongol taungut, kada tahu di kampung ada acara Maulud.
Marasa handak tahu, Ongol ne lalu manyasah kawalnya badua tadi dari belakang, sambil badadiam bajalan.Sakali Gabau wan Lengkor tadi sudah masuk didalam rumah Haji Untat am.
Saking hibaknya urang di wadah H Untat, Ongol nang maumpati kada kawa masuk ka dalam rumah. Kada dapat wadah baduduk basila inya neh, nang akhirnya tadiri di antangan pagar ja, malihati urang nang mulai babacaan.
“Mun nang kyini modelnya, bisa kada dapat bagian aku neh!,”garunum Ongol dalam hati, sambil bapikir mancari akal, supaya kawa masuk ka dalam rumah.
Pas juaai, rahatan urang handak baamin bebacaan doa, timbul bukah Ongol ke bawah pohon nangka pas di halaman rumah H Untat. Maka pohon nang parak lawan andakan sangkar, inguan burung sidin.
“Hiii Biawaaak..! sing ganalan...!!. Handak menagok burung ..!! kuriak Ongol nyaring, sampai takajut urang nang lain mandangar. Napa ada, sabagian urang di rumah tadi lalu badiri, manyasah kaluar, ada nang kada ingat mamasang sandal lagiam. H Untat mintu jua, takaluar, gaer kalau pina burung sidin ditagok biawak.
“Haah...mana inya Ngol..!? sahut H Untat, lawan nafas hengap-hengap. “Itu inya tadi baluncat dari atas pohon ! Lalu pas malihat ulun bukah ke arah padang sabat, sampat ulun buru,” ujar Ongol.
Mandangar nang ujar Ongol, bahimat H Untat manyintari, sampai ka atas pohon.Ternyata lengkap burung sidin dalam sangkar. kedida tanda-tanda handak diincar biawak.
Akhirnya, dibawai H Untat warga nang kaluaran rumah rahatan bebacaan doa tadi, supaya masuk pulang melanjutakan acara. Apa ada Ongol, nang akhirnya bisa umpat masuk jua kadalam rumah.
“Ayo sudaham gin, kita lanjutakan acara. Ayuaam kita masukan lagi, lanjutakan badoa, imbah itu kita makanan lawan babagi sambako,” ujar H Untat. Kalikikan Gabau lawan Lengkor, nang hapal lawan kalakuan Ongol. (gus)
Editor : Agus Jaka Purnama