ilustrasi/dok.radarsampitBahan bakar nang pasti rami dicari urang, napalagi pas harganya naik, maulah banyak nang malangsir, gasan dijual lagi di eceran, yakni Pertalite. Kada katinggalan, warga Kampung Liur rami jua urang malangsiran bensin, jenis pertalite lawan pertamax.
Rupanya Ongol kada katinggalan jua, umpat malangsir, gasan bajual eceran.
”Uy umanya, ikam nang manjualakan lah eceran pertalite lawan pertamax neh. Biar aku nang saban hari malangsir ka pom bensin,” jar Ongol mamadahi si Aluh Lintak, bininya. Inya ne baistilah, manguras matan tangki motornya, satiap dua sampai tiga kali bulang bulik maisi minyak di SPBU.
”Barapaan bah kita bajual saliter?” jar bininya batakun.
”Amun pertalite 14ribu saliternya. Amun pertamax 18ribu. Sualnya wayahini talawas maantrinya, baabsen umanya ai.. ada nang mancatatnya,” sahut Ongol menjelasakan.
Handap kisah, pas bininya bajualan bensin eceran tadi di muka rumah, kawal Ongol nangarannya si Anang Gabau, datang basinggah wan sepeda motornya, handak manukar bensin.
Gabau ne rupanya mamanfaatkan situasi. Pas Ongol rahatan maantri ka pom bensin, datang inya maisi bensin nang dijuali bini Ongol tadi.
”Peralite barapa Luh saliter? ,” jar Gabau batakun. ”14 ribu Nangai, saliter,” sahut Aluh Lintak. Lalui Gabau manyuruh manuang ka dalam tangki motornya saliter.
Pas sudah tatuang bensin tadi. ”Aku kawa bayar satangah liter dahulu nah, 7000, ngini gin duit receh nah. Bautang dahulu lah nang satangahnya,” jar Gabau pulang.
Napa ada, nangaran bensin tadi sudah tabuat kamotor, mau kada mau ai bini Ongol ma-iihakan.
”Kyitu kah Nang. Lalu pang sisanya pabila ikam babayar!?” takun Aluh Lintak. ”Kena pas aku maisi bensin di sini pulang, sakalian ja ku lunasi.!” sahut Gabau, hancap mahidupi motornya lalu bajalan.
Pas giliran Ongol nang manjaga jualan bensin eceran tadi, timbul datang kawalnya nang lain yakni si Lengkor nang handak manukar bensin jua.
”Ngol..aku mambawa duit kada cukup nah, bahutang dahulu lah satangah liter?,” ucap Lengkor.”Uma aii Kor, baya saliter haja kada sanggup manukar. Maka motor hanyar.! sahut Ongol wan muha marangot.
”Harap maklum haja Ngolai, putaran ekonomi wayahini sakit banar, mana motor masih kariditan nah,” jar Lengkor pulang wan muha marista.
Napa ada, marasa kada purun wan kawan tadi, laluai Ongol mautangakan satangah liter bensin wa Lengkor tadi.
Akhirnya, lantaran haur diutangi kawalnya bajualan bensin tadi, Ongol ne mamutar otak, supaya kawalnya nang datang barikutnya kada bautang lagi.
Halat babarapa hari kamudian, datang lagi si Dangdut lawan Asoy, nang rupanya tahu kabar dari Gabau wan Lengkor, amun Ongol ne bajualan bensin kawa diutangi satangah liter.
”Ngol..aku manukar satangah liter haja nah,” jar Dangdut. ”Iih..aku mintu jua Ngolai, pas pasan banar duit nang tabawa nah. Asal kawa gasan babulik karumah,” jar Asoy pulang.
”Naah..pas banar walai, aku bajualan bensin pas satangah literan haja,” sahut Ongol takarinyum, sambil manampaiakan botol bakas minuman baisi pertalite,nang pas isinya satangah liter.
”Bah iyaam kada jadi am aku bahutang,” garunum Dangdut bagaru kapala. Mintu jua wan Asoy.. Rencana dalam hati, buhannya badua ni baharap Ongol manuang saliteran, dibayari satangah ja, nang satangah liternya kena-kenaja mambayar. (gus)
Editor : Agus Jaka Purnama