Meucapkan Ulang Tahun

Pambakal Kampung Liur yakni si Haji Untat  cagaran ulang tahun. Nah, sahabat seangkatan sidin yakni Haji Walet handak mambari ucapan nang baukir pakai papan gabus wan rangkaian kambang nang biasa di pajang di muka rumah urang nang marayaakan ulang tahun.

Haji Walet lalu manyuruh si Ongol lawan si Lengkor nang tulak mancari wadah urang maolahakannya.

“Ngol, ulah dua baris ja kalimatnya, nyaman kada banyak makan wadah. Wan nyaman jua sidin mambacanya. “Tulisakan “SELAMAT ULANG TAHUN HAJI UNTAT. UMUR MEMANG BERTAMBAH TUHA, dibagian atas. SEMOGA SELALU SEHAT, KUAT DAN PANJANG UMUR..nang dibagian bawahnya,” ujar Haji Walet manjelasakan wan bubuhan Ongol, salajur manjulung contoh dicatatan salambar kertas.

Sakira 10 menit bacari di pasar, lalu Ongol wan Lengkor tadi dapat wadah mamasan nang disuruh Haji Walet tadi. “Mang ulahakan tulisan gasan ucapan urang tahun pang, nah sasuai wan nang tatulis di kertas ngini tulisannya,” ujar Ongol mamarintah amang nang tukang ulah tulisan tadi. “Oohh..gampang ha amun nang kyini, malam kena lah jadinya. Harganya 500ribu ha, nang kyapa?,” ujar Amang tadi. “Ayuhaa mangai siip ja,” sahut Ongol maiihakan.

Imbah jadi, lalu tangah malam Ongol wan Lengkor tadi badadiam maantar tulisan nang dipasan tadi ka halaman rumah Haji Untat supaya sidin takajut pas mambuka rumah, wan himung dapat ucapan dari sahabatnya si Haji Walet. Maka tulisan nang baukir nitu tadi, ditukupi buhannya wan kain.

Pas ka isukan harinya, di hari ulang tahun Haji Untat, sidin kaluar rumah. Buhan Haji Walet Ongol, Lengkor, Gabau wan sagalaan Asoy ne mahadang jua di halaman rumah sidin, salajur handak manjulung hadiah ulang tahun.

Pas juaai, Haji Untat mambuka lawang. Takajut sidin malihat ada papan sagi ampat batukup kain di muka rumahnya. “Ayu jii, pian buka. Ada kejutan dari urang ulun,” sahut Ongol manguriaki. Napa ada marasa himungai Haji Untat ne tadi, marasa di elangi buhan Ongol basungsung hari pas sidin ulang tahun. “Iih ayuha, ni pang aku buka,” sahut Haji Untat sambil takarinyum.

Sakali pas sidin buka, dasar bujur tulisan nang dipasan buhan Ongol tadi sama persis lawan nang ditulis di kertas oleh Haji Walet. “SALAMAT ULANG TAHUN HAJI UNTAT. UMUR MEMANG BERTAMBAH TUHA DI BAGIAN ATAS. SEMOGA SELALU SEHAT, KUAT DAN PANJANG UMUR DIBAGIAN BAWAHNYA,” nitu rupanya tulisannya nang di pesan Ongol tadi pas sudah jadi. Napa ada, menceleng mata sidin mambacanya. “Haaah, napa maksudnya ngini Ngol, handak maucapkan ulang tahun kah, atawa handak mahuluti aku buhan kam neh.!,’ ujar Haji Untat manyarik, mambaca tulisan nitu tadi.

Haji Walet maka manapak dahi pas mambaca tulisan nitu tadi. “Naah iyaam, tasalah paham jua buhan ikam ne Ngol. Kanapa sampai dimuat tulisan bagian atas wan bagian bawahnya. Itu patunjuk gasan buhan ikam haja, bukan berarti ditulis jua di papan gabus..! Aduuhaaii..rusak acara..!,” ujar sidin umpat manyariki Ongol wan Lengkor. Gabau maka mangalikik manatawaakan. (gus)