Ongol, Asoy sagalaan Gabau barangkat ka kabun Haji Untat gasan buah durian nang rahatan panen wayahini. Buah itu cagaran dijual di pasar Kampung Liur. Salain dapat upah buah durian, buhannya batiga ni diupah duit jua oleh Haji Untat, gasan maangkutakan buah sidin nitu. Maangkutnya mamakai pikap sidin. Gabau nang manyupir.
”Kita makan ha sabiji dahulu buah durian ngini, hanyar kita tulakan maantarnya ka pasar,” ujar Gabau, sambil buhannya batiga tadi manguyak durian. Samantara durian nang jumlahnya ratusan sudah tamuat di atas pikap, tinggal hangkut ja.
Imbah tuntung, mamose buah tadi, buhannya batiga lalu ka pasar bapikap. Ulih hari pina marimis handak hujan labat, tapaksa kadida nang babuat di balakang. Durian nang hibak tadi ditutupi buhannya lawan terpal. Buhannya batiga paksa bakajal dudukan di muka.
Gabau nang manyupirakan ni katuju jua ada kawan bakisahan, jadi inya manyupir kada mangantuk. Apalagi buhannya batiga sudah saking akrabnya, nang pasti haur tatawaan ja amun sudah bahapakan. “Jangan hanyal tatawa ikam Bau, balalihat lawan jalan,” ujar Ongol managur Gabau nang asik mambawa bagayaan.
Sakalinya, pas hari hujan labat. Timbul taguring sakalinya Asoy lawan Ongol tadi. Maka kapala tahiring pulang ka Gabau nang rahatan manyupir. “Jiiaahh, nyaman banar lah badua talengor guring. Baliuran pulang,” garunum Gabau.
“Brruuttt…” timbul ada nang takantut antara Ongol lawan Asoy tadi. Maka babau durian pulang, sampai sangak hidung Gabau. “Kurang ajar, baisi burit kada baadat lalu badua ngini lah..!” garunum Gabau garigitan. Maka handak maranjahakan ka lubak supaya buhannya badua tadi bangun, kada wani jua Gabau ni kalu pina tabalikan durian di balakang. Paksaai maharit.
Kasangkalan Gabau dapatnya, lalu inya mambalas. Dipalitnya balsam sing hibakan ka talunjuk Asoy wan Ongol nang rahatan guring mangaruk tadi. “Marasaa, buhan ikam,” garunum Gabau kalikikan surangan.
Pas sampai pasar Kampung Liur, rupanya masih hayal guring ja Ongol lawan Asoy tadi. Gabau manyinggahakan pick up nya di warung Acil Jablay, handak mangupi. ”Braaakk..!” bunyi lawang mobil sangaja dihampas Gabau pas inya turun, nyaman Ongol wan Asoy tadi tabangun.
Takipik bangun juaai badua tadi. Ongol wan Asoy mausap liurnya nang balelehan lawan tangan nang hibak balsam. Apa ada, takalipik buhannya badua, akibat ladar muntung ta lapai balsam. Maka cap lombok rawit pulang.
Jadilah pembaca setia, gabung sekarang juga di channel kami!
