Wayahini pinanya mamasuki musim panghujan. Jadi asap kabakaran lahan sudah kada tapi adaam lagi.Nang kaya hari samalam, hujan sing labatan turun di Kampung Liur imbah pas parak subuh, lawan pas senja.
Biasanya amun musim hujan neh, habis hujan ada aja rumah nang kabanjiran, lantaran parit banyak nang tasumbat, akibat ada warga nang mambuang sampah di dalamnya.
Selain itu, banyak jua jalanan dalam kampung nang licak, lantaran kada diaspal lawan paritnya kada disiring. Akibatnya, banyak warga nang lalu lalang kandaraannya rigat kena licak.
”Amunnya tahun ini jalan kampung kita ngini kada tuntung diaspal, alias banyak nang tanahnya dari pada nang baaspalnya, aku yakin musim hujan kena bisa kabanjiran,” garunum Haji Untat, pambakal Kampung Liur pas basinggahan di warung Acil Jablay, lawan sagalaan Gabau, Asoy wan Lengkor.
”Berarti kada bahasil lagi pambangunan ne ji lah?” jar Gabau manyambung.
”Amun nang kyitu, jangan kita pilih lagi kena amun pamilu. Soalnya kita kada merasai pambangunannya. Jalan wadah kita nih, banyak nang licaknya pada baaspalnya, dari bahari,” jar Asoy manambahi.
”Bukannya kada bahasil pang, tapi lantaran duitnya kada cukup jar. Jadi tapaksaai pembangunan jalan di wadah kita ngini balakangan dari pada kampung urang,” sahut Lengkor mamadahi badua tadi.
”Hauu..tumben ikam pintar Kor. Bisa tahu amun duit pambangunan kita nih kada cukup,” jar Haji Untat mamuji Lengkor.
”Jelas tahu Ji ai, nitu lantaran ulun saban hari mambaca koran Radar Sampit. Jadi batambah wawasan,” jar Lengkor lawan muha nang ambungan.
Handap kisah, timbul datang Ongol, kujuk-kujuk pada basah kuyup kahujanan.
”Hau dari mana ikam Ngol, pina bahujan?” jar Haji Untat managur.
”Anu ji ai, rumah ulun handak kabanjiran habis hujan samalam, lantaran paritnya pampan, jadi banyu sadikit lagi masuk rumah..!” jar Ongol, baharap kawalnya hakun manulungi inya manguras parit di muka rumahnya.
”Kami manjaga di sini haja Ngolai, soalnya di sini gin rawan banjir nah. Amun kita lengah banyu bisa naik jua, bahkan bisa sampai ka atas meja,” jar Gabau baalasan. ”Beuuh..buhan ikam ne pangasit jua kada mau manulungi..!” jar Ongol manyambati.
”Bukannya kada hakun manulungi Ngolai, kami di sini sama-sama bajagaan jua nah. Salain banyu sudah naik ka meja, itu nah banyak sudah bebek bakunyungan lantaran banyu naik dari parit ,” jar Asoy pulang menjelaskan.
”Haah..mana inya ada banyu nang naik di sini. Lawan mana inya ada bebek nang bakunyungan. Kadada suaranya tadangar..!?,” jar Ongol pina bingung.
”Ikam ini kada paham jua…itu nah Ngol, banyu kopi lawan teh nang diatas meja ni ngarannya banyu naik. Jadi tinggal manginumnya ja lagi. Lawan bebek nang bakunyungan, adalah motor bebek nang tarandam banyu, alias kahujanan di parkiran,” jar Asoy pulang manjelasakan, sambil manyindir wan Ongol.
”Bah iyaam….buhan kam neh..!,” garunum Ongol kakalahan. Nang lain umpat mangalikik tatawa malihat Ongol pina gelisah. Buhannya kada hakun manulungi, lantaran Ongol ne karancakan dibawai kerja bakti mambarasihakan sampah di parit, inya pangoler turun. Jadi sakali ini dibalas kakawanannya. (gus)
Editor : Agus Jaka Purnama