Salawas musim kamarau neh, banyu sungai di Kampung Liur taumpat surut jua, lawan rasanya mulai payau lantaran tacampur banyu dari laut. Akibatnya, banyak warga koler mandi segalaan betetapas di sungai.Salain itu, banyak jua jamban nang sudah kada tapakai, alias tadampar dipinggir sungai lantaran banyunya surut.
Handap kisah, Ongol mambawai bininya yakni si Aluh Lintak ka kantor pambakal Kampung Liur lantaran ada undangan rapat warga. Sakalinya banyak urang datang. Tamasuk ada kakawanannya salain Lengkor wan Asoy, yakni si Gabau wan bininya, Haji Walet wan bininya, tamasuk pambakal Haji Untat lawan bininya, nang sakalian jadi katua PKK Kampung Liur.
Dalam rapat itu, Haji Untat manyampaiakan rencana gasan memindahakan jamban nang sudah buruk, lawan membawai warga supaya kada lagi mambuang hajat di sungai.
“Aku harap kita samakin rajin mambarasihakan lingkungan. Tautama sungai di kampung kita ngini, harus kita jaga. Apalagi musim kamarau wayahini,” jar Haji Untat pas mambari sambutan.
“Jadi kyapa amun jamban di sungai itu kita bungkar haja. Kada usah lagi kita mambuang hajat di sungai..!,” jar Haji Untat, pas mamulai inti pamanderan.
”Nah..bagus tu. Ulun satuju..!,” jar bini Ongol langsung manyahut.
”Kaya apa nang lainnya. Setuju haja kah, amun babuang hajat kada lagi ka sungai? Lagian wayahini jamban di sungai kada cocok lagi, di Kampung nang ada parak kota kaya kita ini. Marusak pamandangan, lawan maulah pencemaran,” jar Haji Untat.
Amun ulun akur haja pambakalai. Cuman Ongol pina kalihatan sedih banar, mandangar jamban handak dibungkar..!,” jar Asoy mamadahi, sambil maitihi muha Ongol. ”Hauu..kanapa Ngol, ikam pina sedih?,” takun pambakal.
”Aaanu pambakalai…kena kada kawaam lagi sakahandak bacipui banyu pas babasuh,” jar Ongol baalasan.
”Aku tahuai kanapa Ongol pina keberatan, amun jamban dibungkar,” jar Asoy pina mamancing. Kanapa Soy?,” sahut Lengkor manahapi.
”Jamban nang biasa dipakai Ongol nitu banyak kenangannya. Alias banyak luangnya.!,” jar Asoy sambil mangalakak tatawa, mambuka rahasia. ”Hah..kyitu kah?! Pantas haja pina keberatan,” sahut Haji Untat, wan muha masam.
”Bubuhan ikam jangan lempar batu sambunyi tangan lah!!?..Nyatanya belangnya sama haja seberataan. Sama rancak mahintip jua,” jar Ongol membela diri, kada hakun dikarubuti surangan.
Napa ada, mandangar banyak luang di jamban, bubuhan bini buhannya lalu mulai hamuk berataan. Tamasuk jua bini Ongol, bini Gabau, bini Haji Walet, sampai ka bini pambakal.
”Berarti amun aku mandi di jamban, buhan ikam nang katuju mahintip lah..!,” jar Acil Jablay, badiri sambil mata menceleng. Samantara buhan Ongol wan nang lain, kana kibit bini masing-masing.
”Pian ni, dasar lanji lah..! Tuha sudah…katuju mahintip. Pokoknya hancurakan haja pambakalai jamban nang masih ada itu..!,” jar bini Ongol bamamai, sambil mangibiti lakinya. Napa ada, kada banyak alasan lagiam, kasimpulan rapat itu akhirnya semuaan sepakat, jamban dibungkar. (gus)
Editor : Agus Jaka Purnama