Menyambut hari kemerdekaan Republik Indonesia, bubuhan kampung liur rami juga maadakan lomba 17an. Salah satunya nang paling ditunggu yakni lomba maolah wadai. Jadi satiap RT di kampung itu, harus manampilakan wadai olahannya nang khas, gasan dinilai oleh pambakal. Nang maulahnya bubuhan ibu-ibu.
Jadi masing-masing perwakilan RT tadi neh, saling basaing maulah wadai supaya jadi juara. Ada nang bulah wadai bingka, ada nang meolah wadai bolu kek, nang hintalunya sampai 40 biji.
Imbah itu ada jua, nang beulah wadai sarang semut, supaya dapat juara satu lantaran wadainya balubang-lubang didalamnya.
Samantara itu, di RT wadah Ongol badiam, rupanya hinip ja. Kada talihat ada tanda-tanda sibuk baulahan wadai.
“Ngol ikam salaku katua RT, kanapa kada meolah wadai. Bini ikam kada umpat kah?,” jar Haji Untat, selaku tatuhaan kampung managur.
“Kada baisi modal ji ai, efesiensi jua neh, kaya pamarintah jua,” sahut Ongol.
“Astaga, kada perlu banyak modal Ngolai. Itu nah ada pisang masak wadah ku, pupuhi lawan tapung, imbah itu santan nyiur, dipuntal ka dalam daun pisang, lalu dikukus. Jadiam wadai,” jar Haji Untat, sambil mamaksa Ongol wan bininya umpat lomba.
“Ceh kada harapan manang. Orang nyaman-nyaman wadainya. Ada bingka, ada sarang samut, segalaan bolu,” jar Ongol agi.“Kada usah bacari manang Ngolai, yang penting RT kita ne umpat lomba, bepartisipasi jua tu,” sahut Haji Untat pulang.
Akhirnya Ongol ni hakun mambawa bininya, yakni si Aluh Lintak umpat lomba maolah wadai.
Handap kisah, lalu sampai masanya panilaian juri. Wadai-wadai andalan tadi diandak di meja, di lapangan halaman muka kantor pambakal.
Bedahulu datang bubuhan RT wadah Gabau nang mambawa wadah bingka. “Cagaran kita juara satu neh,” jar Gabau percaya diri, pas maandak akan wadai ke atas meja penilaian.
Imbah itu datang wadai bolu, segalaan sarang semut, ada jua wadai kelamben behias, mirip wadai ulang tahun. Pokoknya bau harum tu pang dapatnya, lantaran bau wadai tadi mendangur ke sana kamari.
Habis terkumpul wadai-wadai tadi, sekalinya ulahan bini Ongol ne balum diandak ke meja juri. Kada lawas pas juri takumpul, hanyar datang bedudi wadai olahan Aluh Lintak tadi. Sekalinya betunjulan meandaknya ka meja juri. Bini Ongol ne supan maju pas disuruh maantar, lantaran wadai pais pisang nang diumpatakan lomba.
Tapaksaai akhirnya Ongol nang maju maantar ke meja juri, padang dikurihingi urang nang malihat.
Pas juri mulai menilai, sakalinya timbul datang angin kencang, sampai maniup ratik wan dabu di halaman kantor pambakal. Maka debu tadi, sampai terbang, hinggap barikit di wadai nang umpat lomba nitu.
Pas diperiksa, wadai bingka sekalinya tatapal dabu. Mintu jua lawan wadai sarang samut, segalaan wadai bolu, lawan wadai kelamben. Sampai hilang baunya yang harum tadi. Lalu juri, kada hakun manyicipi rasanya nang tacampur dabu.
Akhirnya tapaksaai, wadai Pais Pisang olahan bini Ongol nang jadi pamanangnya. Pasalnya wadai paisnya babungkus daun pisang, jadi kada kena debu pas ada angin kancang tadi. Wadai nang lain, habis takubui dabu.
“Na Ngol, kada disangka kalo, amun takdir berkata lain. Kawa aja kita juara,” jar Haji Untat umpat marasa himung. “Alhamdulillah ji ai, kada kawa dianggap remeh sakalinya wadai Pais ne lah,” sahut Ongol.(gus)
Editor : Agus Jaka Purnama