Kawal akrab si Ongol nangarannya si Gabau, parak sabulanan lawas kada kalihatan di Kampung Liur. Sakalinya usut diusut, inya ne masuk penjara.
Rupanya Gabau dituduh umpat mamakan duit koperasi, wadah inya bagawi. Padahal gawiannya, baya tukang babarasih haja, lawas sasuruhan urang.
Pasalnya katua koperasinya, dikadukan urang ka pangadilan, akibat manilap duit anggota, kadida bukti pertanggujawabannya. Lalu ai Gabau ni umpat juga tarait.
Pas Ongol ne tahu kisahnya, inya mambawai Haji Untat manjanguk Gabau nang lagi di penjara tadi.
”Apa kabar ikam wal, betah haja kah di sini? Pina baputih awak ikam,” jar Ongol managur Gabau, pas badapat di ruangan khusus gasan manjanguk tahanan.
”Sakit lalu tahu lah..! Makan kada nyaman, guring kada karuan. Makanya sampai baputih awakku, lantaran pucat kurang darah..!” garunum Gabau bamamai.
”Ooh mintu kah? Sabar haja wal ai, ini ngarannya cobaan pakai ikam. Jalani ja, paling kada lawas lagi ikam kaluar. Mudahan dapat potongan tahanan, pas hari kemerdekaan kena,” jar Haji Untat pulang manasihati Gabau.
”Amun boleh tahu, nang sabalah mana garang kamar ikam wal? Barapa ikung kawal ikam nang guring sakamar nitu?” jar Ongol pulang batakun. Bamamai pulang Gabau ne mandangar takunan kawalnya nitu tadi.
”Aduuh..ikam ne Ngol, di sini mana ada kamar. Nang ada nitu sel penjara. Nitu gin guring batuyuk lawan tahanan nang lain. Persis nang kaya iwak takurung di dalam keramba..!” jar Gabau mangisahakan.
”Sabar haja wal. Nang kyituam ngarannya cobaan hidup tu,” jar Haji Untat pulang manyabari Gabau.
”Amun sel dalam penjara ne sampai kahibakan tahanan, berarti urang nang babuat jahat samakin banyak lah ji? Wah bahaya neh..!,” jar Ongol manakuni wan Haji Untat.
”Ahh..kada jua, nitu artinya penegak hukum samakin rajin bagawi, samakin tegas menangkap penjahat, wan kada kawa disuap..!” sahut sidin.
”Tapi tatap ja kajahatan batambah amun penjara sampai hibak urang nang di tahan..! jar Gabau pulang manangkari Haji Untat.
”Sabujurnya dimana-mana ai kejahatan itu selalu betambah. Tapi ada kelasnya. Ada nang kada jadi pas handak babuat jahat, lalu ada nang kada katahuan. Ada jua nang katahuan tapi kada ditangkap. Sampai ada jua nang sudah tetangkap, tapi bisa ja, sekalinya lapas lagi,” jar Haji Untat menjelasakan.
”Berarti tasalah mamanjaraakan ulun ne lah. Soalnya ulun baya sasuruhan haja, manukar akan nasi bungkus lawan pentol gasan bubuhan pangurus koperasi rapat. Lain lantaran akibat baulah kejahatan..! Kada adil hukum di negeri kita nih..!” jar Gabau membela diri.
”Bujur aja ikam kada babuat jahat, tapi ikam umpat jua nang mamakan nasi bungkus nitu, umpat jua mamakan pentolnya. Ujar, ada angsulannya kada ikam buliki lagi. Kadida banota pulang duit nang ikam tukarakan itu. Jadi hakim maanggap ikam umpat mamakan duit korupsi jua ai,”jar Ongol umpat mamadahi Gabau.
”Jiaah..amun nang kyitu kanapa kada di penjara jua nang manjual nasi bungkusnya.
”Naa..ituam jar ku tadi. Bisa aja buhannya dipenjara. Tapi ngaliham mancarinya, apalagi nang bajualannya sambil bakaliling. Ikam manukar akan nasi lawan pentol, kadida bangaran warungnya..!jar Haji Untat.
Napa ada, bagaru kepala ai Gabau padang muha masam, lantaran marasa sial. Mana Gabau ne kada ingat lagi lawan panjual wadahnya manukar pentol lawan nasi nitu. Lalu disambat urang umpat terlibat jua.(gus)
Editor : Agus Jaka Purnama