Di pasar nang kada jauh dari Kampung Liur rami buhan padagang bajualan buah. Rupanya pas masuk musim kemarau ngini, banyak buah nang panen, mulai dari rambutan, mangga, manggis, durian, sampai buah pekat gin ada jua urang nang bajual.
Kada katinggalan, Acil Jablay nang bawarungan bajual mie lawan nasi kuning gin umpat jual manyampatakan bajualan buah, rambutan lawan manggis.
“Akui banyak buah pian ne Cil, kulihan mana?, dari kabun surang kah?” takun Gabau pas singgah mawarung lawan sagalaan bubuhan Lengkor wan Asoy.
“Ya jelasai aku manukar jua Bau ai, mana ada aku baisi kabun,” sahut Acil Jablay pulang.
“Rambutan ngini barapa satampung Cil?” ujar Gabau pulang. “Murah ja, lima ribu ja,” sahut sidin pulang. Lalu kada banyak bunyi, manukarai Gabau tadi satampung rambutan, gasan mandangani buhannya mangupian di warung.
Kada lawas datang si Ongol pulang. “Akui banyaknya pian bajual buah Cil?” takun Ongol pulang. Rupanya koler banyak manyahut Acil Jablay tadi. “Ikam takun lawan Gabau ha, amun handak manukari buah ku. Inya sudah tahuam. Aku lagi haur baharaguan!,” sahut acil.
“Uma aay, galaknya lawan ulun,” garunum Ongol.
“Kulihan dari mana ngini?,” takun Ongol pulang nang sama jua wan takunan Gabau tadi. “Sidin manukar jua di kabun urang, satampungnya lima ribu,” ujar Gabau manyahutakan.
“Astaa..maksud aku nang buah manggis ngini. Kadanya aku batakun sual rambutan pang,’ ujar Ongol pulang ma les, sangaja handak mahapaki Acil Jablay.
Mandangar nang kyitu ujar Ongol, mau kada mau ai Acil Jablay nang manyahut. “Amun buah manggis ngitu urang umpat maandak kamari Ngol, kanapa ikam handak manukarkah, pina takun-takun?” sahut Acil Jablay nang sudah karancakan dihuluti Ongol.
“Kena dahulu, manis kada cil manggisnya neh?” takun Ongol pulang.
“Nyataai manis. Amun kada manis, kada ku hakun manjualnya. Baik kubariakan gasan buhan ikam,” sahut Acil Jablay. “Bujuran lah cil, awas amun pian bakaramput,” ujar Ongol pulang.
“Bujuran Ngol ai, lain nang kaya ikam ada tampang bakaramput!,” sahut Acil Jablay mambalas.
“Barapaan sakilonya neh?” takun Ongol pulang. “Sakilonya, ayuha 10 ribu wara, lawan ikam nah, salajur gasan palaris,” sahut Acil Jablay pulang.
Kisah takajut Ongol mandangarnya. “Akuii Cil, larang banar. Bisalah manggis nang babaya ganal nang kaya karak hidung ngini, harganya 10 ribu sakilo?” ujar Ongol manampalaki.
Haur batakun tarus, manukarnya kada pasti lagi, malah Ongol ne manyambati lawan manggis Acil Jablay tadi, apa ada maulah sidin sarong pulang. Langsung baik tekanan sidin mandangar pandiran Ongol nang katuju mahuluti sidin.
“Sambarangan memang ikam ne Ngol manyambat. Itu sudah muraham harganya. Nang kyini ja nah, amun ada karak hidung ikam saganal manggis ne kaluarakan, nyaman aku tukari 20 ribu sakilonya. Luang hidung ikam kan ganal, jadi wajar aja karaknya nang kaya manggis ne,” sahut Acil Jablay mambalas.
Apa ada mandangar kyitu, timbul hinip Ongol kasasupanan. Hapak lalu inya, ditatawaakan bubuhan Gabau nang dari awal serius mandangarakan.(gus)
Editor : Agus Jaka Purnama