Wayah musim piala dunia ne, bubuhan Ongol wan kakawanannya haur rancak bagadang ja. Napa lagi amun ada pertandingan rami, nang mainnya rata-rata mulai jam 1 malam sampai baisukan sungung. Bisa sampai subuh tu pang buhannya bagadangan di pos ronda Kampung Liur.
Pambakal kampung, yakni Haji Untat baistilah maandak tv di pos nitu, supaya bubuhannya nang ronda jadi samangat. Salain nitu, Acil Jablay nang warungnya kada jauh matan pos ronda, rancak jua manyumbang wadai gasan bubuhanya nang ronda, sakalian manonton bola neh.
Handap kisah, pas tadi malam bubuhan Ongol, Lengkor, Gabau, Asoy wan sagalaan Dangdut, tamasuk Haji Untat, takumpulan di pos ronda. Buhannya manyaksiakan pertandingan pambukaan antara Meksiko malawan Afrika Selatan. Baistilah buhannya ne masing-masing mambawa tapih, gasan bakalubut supaya kada kadinginan.
”Ikam manjagoakan siapa Soy di piala dunia sakali ini?” takun Ongol sambil malihati ka tv, nang sudah manyiarakan pertandingan, sambil mamakani gumbili wan kunjui bajarang.
”Aku mandukung Meksiko sakali ini, kuat banar pamainnya neh,” sahut Asoy.
Mintu jua lawan Haji Untat sagalaan, Gabau wan Dangdut, buhannya batiga kompak mandukung Meksiko.
”Amun ikam pang Ngol, siapa nang favorit?” jar Haji Untat manakuni.
”Sabujurnya ulun ne katuju wan Italia pang ji, tapi lantaran kada lolos, jadi tahun ini ulun mandukung Belanda ja. Buhannya banyak mamakai pamain top berataan,” sahut Ongol.
Mandangar inya mandukung Belanda tadi, pina mangalikik Lengkor. ”Kanapa Kor ikam tatawa, maremehakan kah?” jar Ongol marasa tasinggung.
”Kadanya pang wal, cuman salawas Piala Dunia neh, baluman suah juara lagi. Nang adanya, malah kalah tarus, walaupun rancak ka pinal,” sahut Asoy pulang.
”Tenang haja, tim nang lihai nitu biasanya kalah badahulu. Lambat panasnya, tapi amun sudah panas, pacangan mahambur tim nang lain tu pang,” jar Ongol pulang, kada mau kalah.
Handap kisah, pas rahatan buhannya bakisahan tadi, sakalinya partandingan di tv, pamain Meksiko mencetak gol.
”Goool....!Gool...!..Gool..!,” jar Asoy nang pandahulu urang bakuciak singnyaringan sambil badiri padang batapih.
Imbah nitu, nang lainnya umpat jua badiri sambil bahindik kagirangan. Tamasuk Haji Untat nang sudah tuha, umpat jua badiri sambil mangibah wan tapih. ”Horee...!..Hore...!,’” akhirnya Meksiko, tuan rumah manaang..!,”jar sidin bakuciak.
Sakalinya, asik buhan pandukung Meksiko tadi bakuciak kagirangan, timbul mandadak tahambur kaluar dari pos ronda, sambil mangibah wan tapih.
”Baaah iyaam, dasar jua nah...siapakah ampunnya neh..!,” jar Haji Untat manyumpah, sambil manukup wan hidung.
”Ongol ji ai...ulun tadi sampat mandangar bunyinya sadikit...,” sahut Gabau nang badahulu kaluar.
Usut diusut, sakalinya rahatan buhannya bahindik kagirangan pas Meksiko mencetak gol ka gawang Afrika Seltan tadi, si Ongol ne diam-diam bakantut ‘’phuuuuutttt,” jar bunyinya, babaya inya ja sorang nang mandangar.
Napa ada, kakawanannya nang padang banga-nga kagirangan, sampat tahingut baunya nang mambarangat, nang bisa maulah urang rasa karacunan gas nitu. (gus)
Editor : Agus Jaka Purnama