Sudah dua hari ini, pambakal Kampung Liur yaki Haji Untat garing. Maklum wayahnya pergantian cuaca neh, banyak nang kada tahan, lalu mudah banar kena penyakit. Apalagi sidin tabilang urang nang sudah tuha.
Mandangar Haji Untat tadi garing, bubuhan Ongol, Gabau, Lengkor manjanguk ka rumah sakit.
“Aku dangar sidin sampai sasak nafas ujar, lantaran kena flu berat. Wayahini sampai opname sidin di rumah sakit,” ujar Ongol mangisahi, pas buhannya dalam perjalanan ka rumah sakit.
“Yaam sidin wayah ni masih baimpus lawan mamakai oksigen jar,” ujar Gabau manyahuti.
Sakira saparapat jam buhannya di perjalanan dari Kampung Liur, akhirnya sampai di rumah sakit wadah Haji Untat tadi dirawat.
Untungnya buhannya baampat tadi taimbai lawan jadwal manjanguk pasien, jadi bisa langsung masuk karuangan Haji Untat dirawat.
Pas dijanguk bubuhan Ongol ne, Haji Untat sudah bisaam bepander walau masih hengap-hengap nafasnya . Padahal sabalum masuk rumah sakit, sampat segalaan sesak nafas sampai siup, gara-gara demam, naik tekanan, becampur flu.
Tapi walaupun kyitu, Haji Untat masih kada kawa dibawai bapandir lawas. Di hidung sidin masih ada selang oksigen. Lawan ditangan sidin jua masih bapasang selang infus.
“Assalamualaikum mang haji,” ujar Ongol bagimit, salajur masuk ka ruangan Haji Untat.
“Hmm..walaikum salam. Ayuja masukan,” sahut Haji Untat bagimit, padang hidung masih ba selang oksigen.
“Nang kyapa kaadaan pian, sudah mambaik kah? ,” ujar Gabau pulang manakuni. “Alhamdulillah, sudah lumayan. Tasisa nafas ku ja lagi nang masih mahengal,” sahut Haji Untat sambil sasakali malapas lawan corong oksigen di muntung sidin.
Buhan Ongol nang manjanguk ni duduk dihiga ranjang Haji Untat barabah, ada jua nang badiri dihiga sidin, sambil mauruti batis.
“Jangan talalu banyak ditakuni, kasihan sidin manyahut. Kita doa akan ja nyaman sidin lakas sembuh, lakas pulang takumpul wan kita di kampung,” ujar Lengkor managur.
Kada lawas, buhannya baampat tadi handak bapamit bulik. Nangaran Haji Untat ne urang nang paling dituhaakan di Kampung Liur, jadi sabalum bulik buhan Ongol ne basalaman bacium tangan.
Tapi kanapakah? pas giliran Ongol handak bapamit timbul kejang-kejang Haji Untat ne, nafasnya tambah hengap-hengap “toloong..toloong,” ujar Haji Untat babisik.
Napa ada, panik ai buhannya. “Hauu, kanapa sidin neh timbul sesak nafasnya.!, Lakasi kiau dokter..!,” ujar Gabau.
Samantara Ongol mamingkuti Haji Untat nang hengal-hengal nafasnya tadi. Gabau wan Lengkor bukah mangiau dokter, sakira 5 menit langsung datang dokter nang dicarii buhannya tadi.
“Dok tolong dok, timbul sidin ne pina sesak nafasnya!. Bahaya amun lambat diurus, bisa salajur!,” ujar Ongol pas dokter datang. Pasien yang sa kamar lawan Haji Untat, umpat takalipik jua takajutan.
Imbah nitu lalu mamariksaai dokter tadi. Maka umpat jua bingung, kanapa Haji Untat timbul hengap-hengap nang kaya urang kahabisan nafas.
Sakalinya imbah ditelusuri, sidin sampai kyitu gara-gara Ongol manjajak selang oksigen sidin nang manjuntai ka lantai dihiga ranjang. Jadi tagapit udara nang dihirup sidin. Itaum meolah sidin hengap-hengap handak mati kahabisan nafas.
Maka Haji Untat ne handak sarik kada kawa. Jadi baya mata sidin aja nang menceleng, melihati kelakuan bubuhan Ongol.
“Aduuh, sakalinya pian ne jua nang maulah sidin sesak nafas. Amun selangnya pian jajak sampai kada mengalir oksigennya..!,” jar Dokter babamami lawan Ongol.
Sabaiknya buhan pian sudah haja menjanguknya, supaya sidin kawa istirahat. Jadi lakas sembuh..!,” ujar Dokter tadi selajur mamadahakan bahwa jam membesuk pasien sudah habis. Napa ada, lalu bulikanai barataan, padang muha birai lantaran supan. (gus)
Editor : Agus Jaka Purnama