Salawas musim bencana, nang kaya kabakaran, kabut asap, sampai gunung melatup, banyak jua urang nang mengumpulakan sumbangan. Baik ditujuakan gasan korban, atau pun gasan relawan nang mambantu maatasi bencana. Ta utama bencana kabaran lahan.
Di warung Acil Jablay, wadah bubuhan Ongol rancak mangupi an. Ada jua diandak kotak sumbangan, gasan membantu korban kabakaran, lawan membantu relawan pamadaman karhutla.
”Kita banyak-banyak ba doa jua wayahini walai, kita kada tahu lagi pabila ampihnya kabut asap kabakaran lahan. Untungnya wadah kita ne kadida gempa segalaan gunung melatup,”jar Anang Gabau pas mawarung, sagalaan Lengkor wan Dangdut.
”Ngarannya bencana kadida nang bisa menebak. Tapi wayahini banyak jua bencana akibat diulah manusia jua. Kaya kabut asap neh..!jar Lengkor pulang manyahuti.
”Huss..bubuhan ikam jangan hanya bisa mambahas bencana haja, yang penting wayahini kita harus membantu. Misalnya mambari sumbangan, gasan mambantu korban bencana atau buhan relawannya,” Dangdut pulang mamadahi kawalnya badua nitu.
”Di mana Dut amun handak manyumbang, di masjid kah atau kita kirim surang lewat transfer?” takun Gabau.
”Ini nah ada kotak dititip urang di warung ku ngini, batulisan sumbangan gasan membantu maatasi kabakaran lahan,” sahut Acil Jablay, nang dari tadi manalinga pandiran buhannya batiga.
”Iih lah, ada kotak sumbangan sakalinya di sini. Ayuam nah kita manyumbang, sa iklhasnya.!,” jar Lengkor mambawai nang lain.
Napa ada, lalui tangan buhannya batiga tadi mancaluk ka kantong sorang-sorang. Sekalinya mancari duit nang tahalus nilainya gasan mambari sumbangan. ”Nah..jangan dilihat nilainya walai, nang penting kaikhlasannya,” garunum Gabau sambil birai-birai muha, lantaran inya mamasukakan duit lima ribuan salambar.
Samantara Lengkor wan Dangdut, manyumbang sapuluh ribu sorang.
Kada lawas datang si Ongol kujuk-kujuk. ”Hauu..ada kotak sumbangan gasan karhutla kah ne? Sudah lah buhan ikam manyumbang? Jangan baya dilihati ja!,” jar Ongol pina musti managur kawalnya batiga nitu. ”Buhannya sudaham Ngolai, ikam aja nang balum..!,” jar Acil Jablay manyahuti.
Langsungai Ongol mambuka wan dompetnya. Rupanya inya ne mamilih, mancari duit receh gasan manyumbang. Padalah di dompetnya adaja talihat duit saratus ribu lawan lima puluh ribuan. Pas dapat duit receh dua ribuan dua lambar, lalu Ongol mamasukakan ka kotak tadi, sambil mambalakangi kakawanannya, supaya kada talihat.
Sekalinya, pas tuntung Ongol mamasukan duit ka kotak, tiba-tiba Lengkor manapuk bahunya, manjulung duit salambar saratus ribuan. Lalu dijumput oleh Ongol duit tu tadi, langsung dimasukkannya jua ka dalam kotak sumbangan tadi.
”Beuhh.. harat jua ikam ne Kor lah. Sakali manyumbang saratus ribuan…!,” jar Ongol managur Lengkor nang manjulung duit saratus ribuan tadi.
”Hauu..kadanya kyitu pang Ngol. Duit tadi tu gugur dari dompet ikam, pas ikam maambil dari salawar. Pas kujulung ka ikam, sekalinya ikam masukakan ka dalam kotak sumbangan. Ya syukurai, ganal pahala ikam Ngol,” sahut Lengkor.
Langsung Ongol maitihi pulang ka dalam dompetnya, sakali dasar bujur kadida saratus ribuan salambar. Sudah tamasuk ka dalam kotak sumbangan tadi.
Napa ada..Managuk liur ai Ongol lawan muha masam. Tatawaan buhannya maitihi muha Ongol, nang pina berat hati, lantaran duit saratus ribu tamasuk kotak sumbangan. (gus)
Editor : Agus Jaka Purnama