”Uuuy, umpat aku ja nah kita makanan di warung,” ujar sidin manawari buhannya. Napa ada mandangar dibawa makan tadi, hancap batatiga baluncat masukan ka dalam mobil Haji Untat.
”Ayuu Ji ai segera kita meluncur, barang ha kamanakah pian mambawa urang ulun ne makanan. Asal parut kanyang ha,” ujar Ongol pas sudah babuat di dalam mobil.
Sakalinya, Haji Untat tadi maarahakan mobilnya nitu ka warung Acil Jablay. ”Hahaha..ulun kita tadi kita makanan ka restoran, sakalinya kamari,” ujar Lengkor.
”Barang haja ah, nang penting kita makanan. Sukur sidin hakun mantraktir,” sahut Gabau managur kawannya nitu.
”Yaam, aku lawas kada mancungul kawarung neh, salawas maubati penyakit gejala batu ginjal, sampai sidin ngalih bakamih,” ujar Haji Utat. ”Uuh mintu kah ji, wayahini pang sudah sembuham lah?” ujar Ongol batakun. ”Alhamdulilah, wayahini lancaram aku bakamih, lajang pulang sesamburannya,” sahut Haji Untat sambil takarinyum.
Nangaran ditraktir urang, buhannya batiga tadi lalu bahimat mamasan makanan wan minuman. Tamasuk mamakani tiwadak nang diolah bagoreng lawan tepung. Masing-masing sampai handak dua tiga gelas batambah kinuman. Rupanya kahausan juga dudukan di pos ronda, padang hari panas memberangat.
Sudahnya kupi, mamasan pulang lawan jus, lawan sagalaan es sirup. Buhannya batiga nitu, katujunya memang manginum banyu be es.
Haji Untat nang mentraktir mintu jua, bahimat jua mamasan minuman sampai tiga gelas sidin manginum juss sagalaan es sirup.
Sakalinya lantaran kabanyakan minum es tadi, timbul handak bakamih si Ongol ne. Haji Untat mintu jua.
”Cil umpat bakamih lah kabalakang? Kada tahan lagi nah, kabanyakan minum,” ujar Ongol baizin lawan Acil Jablay. Mintu jua Haji Untat, manyusul maumpati Ongol handak bakamih.
”Nah buhan ikam tapaksa bakamih di padang sabat balakang warungai, soalnya wc ku lagi balum kuisi banyu, lantaran banyu sungai masih surut,” sahut Acil Jablay.
Napa ada, tapaksaai badua tadi basarusup bakamih ka padang sabat di balakang warung, sambil mancari wadah badiri gasan bakamih. Maka batatai badiri Ongol wan Haji Utat ne bakamih. Tapi kepala sama-sama bapaling nyaman kada saling balihatan, jadi baya mandangar banyu juga nang manyambur kaluar.
”Akuiii…pina gancang ji bunyinya, lancar banar lah !,” ujar Ongol mamanderi Haji Untat sambil badiri bakamih.
”Yaam, manjur jua dokter nang maubati panyakit ku samalam. Pas kekeran dapatnya,” sahut Haji Untat.
”Ikam pang Ngol, kada bamasalah paan kalo, maka kadida bunyinya bakakih,” ujar Haji Untat balas batakun.
”Naah alhamdulilah, kadida pang ji ai , lancar ja ne kaluar,” sahut Ongol sambil mata ka lain.
”Ikam basunat lah Ngol..?!,” timbul Haji Untat bakancang.”Jelasai ji, bisa lah kada..!,” sahut Ongol. ”Tapi mereng kalo tatakannya..?!,” ujar Haji Utat pulang.
”Haau..dari mana pian maka tahu..!? sahut Ongol mancangangi sidin. ”Nyataai aku tahuu..!, amun kekeran ikam tu salah, kada ka muka bakamih..!,” ujar Haji Untat mangancangi Ongol.
Pas ai manjanguk…sakalinya Ongol ne mangamihi batis Haji Utat. Napa ada..puuukk..! di lapuk sidin kapala Ongol dapatnya.
”Bakamih tu ka muka sanaa, jangan nang ka batis uraaang..!!,” ujar Haji Untat basasarik.
Napa ada, tahinip minta ampun Ongol dapatnya, langsung bukah bajauh dari pada ditambahi Haji Untat pulang lapukan ka kapala tadi.
”Ampuun ji ai, tasalah keker dari tadi rupanya, lantaran kabanyakan minum,” sahut Ongol. Tapaksa inya dihukumakan maambil banyu ka sungai, gasan Haji Untat babasuh.(gus)
Editor : Agus Jaka Purnama