Mamasuki musim kemarau wayahini, buhan Kampung Liur mulai habut maantisipasi kebakaran lahan lawan hutan. Haji Untat nang jadi pambakal Kampung Liur, lalu maambil kabijakan maulah kelompok relawan pamadam kabaran. Supaya amun ada kebakaran lahan, siap siaga memadamakan. Kada usah lagi salang manunggu mobil pamadam kabakaran.

Buhan Ongol wan Anang Gabau, Lengkor, Asoy sagalaan Dangdut rupanya baminat jadi anggota relawan pamadam kabakaran tadi. Imbah tebentuk, lalu Haji Untat manunjuk Ongol jadi katua regu. 

”Ngol..nitu ada paralatan nang kawa dipakai gasan mamajahakan api. Biar pun seadanya, yang penting kawa pahadangan manahan api, supaya kada baganal.!,” ujar Haji Untat bapasan, sambil manjulungi parangkat mesin kompresor, mesin banyu, bak panampung banyu wan seperangkat selang nang dimuat di dalam gerobak. 

”Umpat batakun Ji? Ulun jadi katua regu ni, apa pangkatnya?,” jar Ongol batakun.

”Ooh..karena buhan ikam ne pasukan relawan, jadi pangkat ikam samantara ini Plt Ngolai,” sahut Haji Untat.

”Hah..napa nitu artinya Plt ji?,” jar Ongol pulang kada paham.

”Plt nitu artinya, Pajabat lapas tunjangan..!” sahut Haji Untat pulang.

”Nitu artinya kada bagajih Ngolai, sapambari urang ja. Amun ada sukur, amun kadida anggap ja gawian kita ni baamal,” jar Gabau manambahi.  Hinip lalu Ongol, ampiham batakun. 

Handap kisah, sahari buhannya jadi relawan pamadam kabaran tadi, timbul sudah ada talihat asap kabakaran lahan.

”Ada kabakaran, wadahnya parak kabun Haji Untat..! Ayu lakasi kita basiap..!,” jar Lengkor pas malapor ka Ongol, nang rahatan basantai di pos ronda padang hari pina mendung. 

Malihat asap pina tinggi, hancap Ongol mamarintah anak buahnya tadi manyurung garubak pamadam, mamarki lahan nang tabakar tadi. Napa ada langsung sigap, Lengkor Gabau sagalaan Asoy, Dangdut ka pinggir sungai maisi profil tank nang gasan dibawa manyiram api tadi. 

”Hauu..ikam pang Ngol, napa nang digawi? Manyuruh kami haja kah?!” jar Gabau protes.

”Ayuja, buhan ikam maisi banyu dahulu ka batang. Aku badahulu ka lokasi, mamantau kaadaan.!” sahut Ongol sambil bahancap naik motor surangan ka lokasi kabakaran. 

Rupanya sampai tapaluh manggah kakawanan Ongol tadi maisi banyu ka dalam profil tank nang gasan dibawa manyiram kabakaran tadi. Maka manjuhung pulang wan gerobak nang mahangkut profil tank banyu tadi. 

Pas sudah sampai di lokasi, sakalinya hujan turun manyirami lahan nang tabakar tadi. Napa ada, lalu kada tapakai banyu di profil tank nang uyuh-uyuh di hangkut anak buah Ongol tadi. 

Kaujungannya bamamai buhan Gabau, Lengkor, Asoy wan Dangdut nang padang tapaluh mambawa banyu ba profil tank tadi.

”Dasar jua ikam ne Ngolai, kami tapaluh manjuhung banyu bagarobak, sakalinya kada tapakai. Ikam maka santai banaung..!,” jar Dangdut bamamai. 

”Hauu... Hujan ni nah tiba-tiba turun, mana aku tahu.!,” sahut Ongol kada hakun disalahakan.

”Tapi ikam nang mambari parintah. Kada balihat hari sudah mendung, tatap ja kam suruh kami maambil banyu gasan manyiram kabakaran..!,” jar Gabau pulang basasarik.

”Nah iyaam..saraba salaham kyini. Sudah diperintah tasalah jua. Kena aku kada mambari perintah tasalah jua.!,” garunum Ongol sambil bagaru kapala.

Rupanya, saking samangatnya buhannya nang hanyar jadi relawan pamadam kabakaran tadi, kada balihat lawan hari pas handak manyiram kabakaran. Biar pun hari mendung parak hujan, tatap ja tulak manyiram kabakaran lahan. Padahal pas rahatan manyiram, timbul hujan turun sing labatan, mambasahi lahan nang tabakar tadi. (gus) 

Editor : Agus Jaka Purnama