Umpat Maandak

Radar Sampit • Dipublikasikan Sabtu, 14 November 2026 | 06:58 WIB
Ilustrasi Ongol/radarsampit/AI
Ilustrasi Ongol/radarsampit/AI

Kawan Ongol yang ngarannya Si Anang Gabau ne cuba-cuba mambuka warung kopi alias café sederhana. Inya buka bejualan khusus malam ja, lantaran amun siang ini sambil bagawi jadi ojek online.

Sudah samingguan inya baulah warung kupi, di pinggir jalan parak Kampung Liur. Hasilnya, alhamdulillah kawa ja pinanya manabali isi dompet inya.“Rami jua warung ikam Gabau lah,” ujar Asoy nang datang handak mangopi, waktu mambuka pander.

“Alhamdulillah pang Soy, kawa haja tu gasan betahan pahadangan sambil menggawi nang lain,” ujar Gabau manyahuti. Inya ne mambuka warung, kada surangan, ada anak buahnya saikung nang khusus malayani urang mamasan.

 “Kudangar paacilan ikam banyak jua nang bisaan baulah wadai,” ujar Asoy lagi.

“Nah disitu pang kalabihannya Soy, jadi wadai di warung kopi ku neh ada ja tarus, kada usah kita nang menukar ke luar. Cukup wadai ulahan karabat sorang ja nang dijual,” sahut Gabau sambil manata piring wadai, wan maulahakan Asoy kopi.

Kada lawas buhannya bakisah badua, timbul datang si Ongol, lawan mambawa talam bebungkus lawan kain.

“Uuy Gabau, kawa kah kawan ni umpat maandak wadai nah?” ujar Ongol mamarak mambisiki Gabau.“Aayyy..kawa haja Ngol ai, ayuha andak ja. Wadai apa garang?” takun Gabau.

“Ini nah wadai ulahan biniku nah, pais pisang lawan Pais Kunjui.Wadai tradisional ja kita. Yaam gawian bini di rumah timbang-timbang badiam ja,” ujar Ongol, maandak ka atas meja, imbah itu,  langsung inya bulik. Pinanya handak besinggah ke warung nang lain.

“Jjiiaaah, uy Ngol kada mangopi kah dahulu,” ujar Gabau manawari Ongol nang sudah banaik ka atas motor. “Wah kawal neh, langsung bulik ja, lawas kita kada bakisahan!,” ujar Asoy pulang.

“Kada paan walai, sibuk banar aku, masih ada nang handak kuantari lagi nah,” sahut Ongol sambil menggas lawan motor bajauh pada warung Gabau.

Kaisukan harinya, Gabau pina basasimpun di warung. Rupanya hari pina handak hujan. “Dari pada jualan ku kena tampias kana hujan, sabaiknya ku tutup wan plastik,” ujarnya dalam hati sambil basasimpun. Kada lawas datang pulang Ongol.

“Kyapa wal, habis jua kah wadai ku ditukari urang,” ujarnya manakuni Gabau. “Haaww, ikam kah Ngol, ni nah wadai ikam,” ujar Gabau manyahuti.

“Akuii…pina kada bagarak neh! Kadida nang manukari wadai ku kah?!,” takun Ongol nang sudah baharap wadainya habis tajual.

“Banyakai nang manakuni wadai ulahan siapa. Kusahuti, wadai ulahan bini Ongol,” ujar Gabau manyahut. “Kanapa yu kadada nang hakunnya kah mnaukari?” takun Ongol pina masam muha.

“Sabujurnya, banyak yang panasaran lawan wadai bini ikam ne Ngol, tapi aku kada wani manjual. Soalnya ikam samalam baya bapadah umpat maandak aja.Ikam kada bapadah minta jualakan. Jadi ku kada tahu barapaan harganya?,” ujar Gabau, kada tatahu muha.

“Uuuh, kyitu kah Bau..!!,” sahut Ongol pina sarik wan kancang urat gulu. “Hi..ih, Ngol ai, salah ikam jua pang. Jaka bapadah minta jualakan, kujualakan tu pang,” sahut Gabau pulang.

Apa ada maraju ai Ongol dapatnya,langsung maambil wan wadainya tadi. “Dasar jua ikam ngini, liwaarr. Handak untung surangan ja, kada mau manolongi kawal!,” sahut Ongol marangot, langsung bukah pada warung.

“Tiwas jua ikam. Umpat Maandak ja. Kadida hitungannya kyapa. Ikam langsung bukah jua,” garunum Gabau kada tatahu muha jua, kada maherani lawan Ongol. (gus)

 

 

Editor : Agus Jaka Purnama
Ongol gabau cafe sederhana wadai pais warung kopi