Bubuhan warga Kampung Liur salawas kemarau neh, pina ngalih mencari banyu bersih dari ledeng, gasan mamasak segalaan gasan minum. Pasalnya, banyu sungai sudah tacampur lawan banyu laut. Maka disitu jua banyu ledeng diambil, gasan disalurakan ke warga.
Nang kyitu situasinya, buhan warga ada nang bamandian mancari banyu sumur timba nang kada surut. Ada jua nang baharap banyu sumur bor, lawan banyu pembagian dari pamarintah.
Situasi nang kyitu, Ongol, Lengkor lawan Gabau lalu baisi ide peluang becari duit, yakni bajualan banyu.
Tapi buhannya batiga ne basaing, masing-masing kada mau baimbai mancari sumber banyu gasan dijual tadi. Harga bajual banyu pun masing-masing jua basaing. Nang bajual paling larang yakni si Ongol. Nang paling murah yakni si Lengkor. Jadi harga sesuai sasuai kualitas banyu. Semakin jernih semakin larang.
Hari samalam, buhannya batiga tarampuk mandatangi warung Acil Jablay manawarakan banyu. “Maambil lawan ulun ja Cil ai, tamurah lawan banyak pada nang lain,” ujar Lengkor manawari, sambil mamakai motor roda tiga mambawa profil tank beisi banyu.
“Lawan ulun ja Cil, banyu dari sumur bor, jernih daripada nang lain. Kena lun antari ka rumah,” ujar Gabau kada mau kalah manawari, sambil mambawa drum baisi banyu pakai pik up.
Datang jua Ongol manawari. “Na Cil, pian lihati surang banyu nang lun jual ne, kada maambil dari sungai kada jua maambil dari sumur tanah. Asli jernih nang kaya banyu kinum, dijamin bebas hama. Ini pakai teknologi canggih,” ujar Ongol manawari, inya mambawa banyu nitu tadi ba jerigen, bagarubak.
Malihat banyu nang dijual Ongol pina bening dari nang lain, laluai Acil Jablay tadi manukari. “Barapa sa ember Ngol?” ujar Acil Jablay. “Sapuluh ribu ja Cilai gasan pian,” sahut Ongol.
Imbah itu ditukari Acil sampai sapuluh ember. Napa ada, masam muha Lengkor wan Gabau tadi, kalah ba saing lawan Ongol.
Kaisukan hari,Ongol kahimungan lantaran banyak untung hasil bajualan banyu tadi, lalu mantraktir bubuhan Lengkor wan Gabau makanan lawan mengopi di warung Acil Jablay.
Tapi buhannya batiga ne takajut pas malihat muha mata Acil Jablay tadi. Mata sidin habang, nang kaya urang sakit mata. Wan bibir sidin pucat pecah-pecah lawan besariawan.
“Hauu..hauu, kapana Cil? Pian garing kah?” ujar Gabau manakuni. “Yaam nah, gara-gara takinum banyu nang dijual Ongol samalam..maka sudah ku masak!” sahut sidin bamamai sambil mancelengi Ongol. Napa ada mandam tatunduk Ongol dapatnya.
“Aku handak batakun, banyu dari mana nang ikam jual ka aku Ngol..!?. Bujur aja pang barasih, bening banar, tapi padas di mata, lawan kalat rasanya..!,” ujar Acil Jablay batakun sambil basasarek.
Gabau wan Lengkor ne, panasaran jua handak tahu dari mana kawalnya saikung itu dapat banyu jernih gasan dijual.
“Anu cil ai, banyu itu ulun minta dari kolam renang wadah Haji Walet, lantaran banyak kada tapakai jua,” sahut Ongol.
Napa ada, manapak ka dahi Lengkor wan Gabau mandangarnya. “Pantas ja jernih dari pada banyu sungai lawan sumur. Banyu kolam itu banyak pakai kaporit, supaya kada behama, Kana batunya ikam Ngolai !,” ujar buhannya manggarunum, sambil manatawai.
“Pokoknya aku ganti rugi, ikam tukarakan obat mata lawan obat sariawan gasan aku. Buliki duit ku semalam.. Amun kada ku padahan pambakal! Ini akibat aku mamakai banyu kolam renang yang ikam jual itu,..!,” ujar Acil Jablay manyareki Ongol.
Apa ada, tapaksa ai Ongol tadi hancap bukah ka toko obat mancari nang diminta Acil Jablay tadi. Akhirnya inya nang ba utang lawan Acil Jablay. (gus)
Editor : Agus Jaka Purnama