Ongol wan bininya si Aluh Lintak kada karasaan sudah 10 tahun barumah tangga. Kawal akrabnya yakni si Anang Gabau nang tinggal di sabalah rumah kada suah mandangar ada ribut di dalam rumah tangga Ongol.
”Aku suka Ngolai, ikam laki bini pina rukun banar,” jar Gabau mamuji Ongol, pas inya baelang lawan Lengkor.
”Itulah barakat kami kawin sama-sama handak. Artinya kada dipaksa atau dijodohkan urang tuha,” sahut Ongol.
”Biasanya biarpun sama-sama handak, pasti ada wayah basasarikan atau bahualan di dalam rumah tangga itu,” jar Gabau pulang.
”Amun soal basasarikan pasti ada, tapi kami sama-sama manjaga supaya jangan kaluar sampai kadangaran orang,” sahut Ongol pulang.
”Umpanya soal napa Ngol, ikam bisa tahual wan bini?” jar Gabau handak tahu. ”Paling-paling kami bahualan karna bacacamburuan. Maklum kami kadang sama-sama sibuk di luar. Aku sibuk bagawian, kadang inya sibuk jua bacari sampingan nang halal,” sahut Ongol.
Rahatan asik buhannya bakisahan nitu, timbul datang seikung lagi kawanya, nang langsung manakuni Ongol.
”Kanapa Ngol, maka malam samalam ikam kulihat guring bakalubut tapih di pos ronda, pas parak tangah malam aku bulik lewat situ? Maka kita kadida jadwal ronda paan di pos kamling?” jarnya manakuni Ongol.
”Hauu..kanapa Ngol? Bakalahi kah wan bini?” jar Gabau umpat batakun. ”Bah hai, Soal sepele wara,” sahut Ongol.
”Maka tadi ikam bapadah kada biasa bahual wan bini, tapi nyatanya kanapa maka ikam sampai guring di pos ronda, sampai kanyamukan. Maka padang kabut asap pulang?” ujar Gabau, panasaran. ”Alahai, Gara-gara nyamuk wara,” sahut Ongol pulang.
”Amun baya gara-gara nyamuk, harusnya kada usah bapisah ranjang segala. Coba pang kisahakan. Napa garang nang terjadi,” jar Gabau mambisai Ongol.
”Samalam, kami sakaluargaan manonton siaran langsung timnas Indonesia main malawan Thailand. Mintuha pas datang jua ka rumah umpat manonton. Pas jua banyak nyamuk mahurung, mana lampu pina remang-remang. Aku kahabisan obat nyamuk pulang.
“Pas rahatan tegang-tegangnya manonton. Banyak nyamuk nguing-nguing parak talinga bunyinya. Meolah maok ja,” jar Ongol menjelasakan.
”Lalu pang, napa masalahnya, sampai kam guring di luar?” jar Lengkor mamotong kisah.
”Lantaran kada kawa diburu lagi nyamuk nang hibak tadi, maka langsung kutapaki lawan tangan. Wayah itu kulihat ada nyamuk hinggap di kepala sidin nang longor. Awalnya handak kusalantek lawan jari, tapi kalau pina luput. Padang gerigitan lalu akhirnya angsung kutapak. Sampai mintuhaku bakuriak kasakitan,” jar Ongol bakisah.
”Rupanya tapakanku kagancangan, sampai sidin bakuriak kasakitan. Lalu hilang konsentrasi manonton bola. Nah, lantaran sidin sarik sekalian maraju, lalu pang aku disuruh bini ku bajauh, sampai sidin ampih sarik. Tapaksaai aku guring di pos ronda!,” jar Ongol sambil manggarunum.
”Ooh..amun nang kyitu bujur aja Ongol ne kada bakalahian lawan bini. Guring di luar sekalinya lantaran menempeleng mintuha,” ujar Gabau mambela Ongol.
”Aku sadar aja, samustinya sayang lawan nang anak, harus sayang jua lawan abahnya,” ujar Ongol.
Sakiranya dihati Ongol neh, dasar lawas sudah handak banar manampeleng mintuhanya nang panyarikan itu. Sekali niatnya dasar katurutan jua, gara-gara nyamuk. (gus)
Editor : Agus Jaka Purnama