Kawan Ongol nangarannya Asoy, rupanya hanyar kenalan lawan bebinian bengkeng. Inya pun langsung manaksir.
Handap kisah, Asoy pun langsung dapat alamatnya. Tapi rumahnya lumayan jauh pada Kampung Liur, sakira 2 jam basapeda motor amun handak meelangi.
“Uma ay nang sudah baisi pacar lah, haur kurahang kurihing ja. Jangan ba W- an tarus ja, cuba elangi ka rumahnya sana. Kena ditikung urang amun pacar tu jarang didapati,” ujar Dangdut mahuluti Asoy.
“Ikam hakunlah mandangani aku datang baelang ka rumahnya? ,” ujar Asoy mambawai.“Ayuja malam ni aku dangani, siapa tahu pina ada kawalnya nang bengkeng jua,” ujar Dangdut manyahut.
Pas malam minggu, badua tadi langsung meluncur, naik motor baboncengan. Maka jalan nang dilalui buhannya ne kadap, kadida lampu jalannya, baya ada lampu halus rumah urang ja. Imbah itu, padang kabut asap pulang, banyak kabakaran lahan.
“Pinanya di kampung banar wadah pacar ikam ni Soy, maka kayaini jalannya. Kadap, banyak lubaknya pulang. Amun surangan bisa dirampok urang lewat sini neh,”ujar Dangdut pina gelisah, sambil manggonceng Asoy.
Mandangar nang kyitu, jadi gaer rupanya si Asoy. “Makanyaam aku mambawai ikam, supaya ada kawalku di jalan. Ayuha kena buliknya, ikam kuupah roko dua bungkus, lawan makanan kita di warung,” ujar Asoy.
“Naah kyitu ah, kawal nang paham tu, jadi sama-sama paham kita, hihihi,” sahut Dangdut himung.
Pas tengah perjalanan, timbul ada talihat sabuting lampu motor di balakang buhannya, talihat dari spion. Laluai pina gaer inya badua. “Dut, siapa dibalakang kita yu, model laju bamotor maumpati kita,” garunum Asoy.
“Iih lah, kada tahu jua aku, kita lajui ja nyaman bajauh,” sahut Dangdut sambil tancap gas motor.
Pas buhannya badua ngebut, sakalinya tatap baparak jua lampu motor di balakang buhannya tadi. Rupanya umpat ngebut jua manyasah. Dangdut lawan Asoy tambah takutan, pas motor dibalakang buhannya itu mangalakson.
“Tiiit..tiiit..ttiiit,” sampai tiga kali. “Uuuyyy ! jar,” ada suara urang pulang mangiau.
“Lajui ja Dangdut, inya mengiau pinanya, jangan hakun besinggah, gass lagi !,” ujar Asoy gugup.
Baca Juga: Si Ongol: Menjaga Kabun
“Ayuha, kena kita cari wadah yang rami urang ja gasan singgah,” sahut Dangdut sambil makin gancang manggas motor. Rupanya umpat manggas jua motor di balakang inya badua tadi, tetap manyasah.
Pas masuk kampung nang dituju buhannya tadi, ada warung nang rami jua urang singgahan. “Nah singgah sini ja kita!,” ujar Dangdut.
Sakalinya motor di balakang buhannya tadi, umpat singgah jua. Pas babuka helm sakalinya si Ongol, nang dari tadi manyasah buhannya.
“Akuii laah, sombong banar orang ikam aku kiau malah balaju menggas motor!” ujar Ongol bamamay. “Astaa, ikam kah Ngol sakalinya, maapa maumpati kami di balakang, kami kira urang handak marampok !?,” sahut Asoy.
“Yaam buhan ikam tu kada dilihati dahulu. Aku ne gaer jua bamotor surangan, makanya laju-laju supaya ada imbaian di jalan. Aku handak maambili bini ku di wadah marinanya!,” sahut Ongol.
Sakalinya rumah pacar Asoy tadi, sakampung lawan marina bini Ongol. (gus)
Editor : Agus Jaka Purnama