Haji Untat sebagai pambakal di Kampung Liur, maulah tim relawan padaman api, lantaran wayahini lagi musim kabakaran lahan lawan hutan. Salain, ada nang bagian manyupir, lawan menyemprot api, tim relawan sidin ni ada jua nang bagian tukang ambil dokumentasi, yakni si Ongol.
Supaya gawian Ongol ne lancar, inya ditukarakan Haji Untat kamera lawan sabiji laptop, nang lengkap aplikasinya. Bisa sagalaan, maedit foto dokumentasi, sampai sagalaan meedit video, supaya gambarnya jernih.
Nah, kawan Ongol nangarannya Anang Gabau wan si Asoy, jadi relawan jua di kantor pambakal nitu. Cuma inya badua ne bagian, tukang simbur api bila ada kabakaran lahan, kadang bagiantian manyupir mobil tangki banyu segalaan.
”Kulihat gawian ikam ne pina santai ja Ngolai, haur mamoto-moto ja. Kena baranai di ruangan, mangucik lawan laptop. Kada tapi bapanas.!,” jar Gabau pina bahiri lawan gawian Ongol tadi.
”Hiih..kami maka saban hari manjaga kabakaran lahan, sampai bajagaan siang malam!,” jar Asoy pulang, pas buhannya takumpulan pas jam istirahat di warung Acil Jablay.
”Naah..buhan ikam ne kada buleh bahiri lawan gawian ku. Sualnya ini sasuai lawan skiil ku, lawan kabisaan ku. Sama haja kita nih, sama-sama sibuk lawan tugas masing-masing. Amun kadida dokumentasinya, ngalih kena membuktiakan amun relawan di kampung kita neh, umpat aktif jua manyimbur kabakaran lahan..!,” sahut Ongol, menjelasakan.
”Rancaki pang Ngol, kami badua nah ikam foto, lawan masuk akan video kami badua, pas manyiram kabaran,supaya himung jua kawal neh,” jar Gabau pulang.
”Yaam, mana ikam wayahini baisi laptop nang kawa menyetel film pulang. Pabila jua kah kawal nih, kam setelakan film nang rami,” jar Asoy, umpat jua batangsa.
”Ooh.. Gampang aja tu, kena nah imbah ini buhankam datangi aku ka rumah, amun handak manonton film nang rami. Mumpung bini lawan anakku lagi bulik kawadah mamanya. Film apa buhan kam handak, banyak koleksi di laptop ku?” sahut Ongol.
”Nah..kira-kira film panas ada kah nyawa baisi Ngol?” jar Gabau langsung baparak sambil mambisiki Ongol.
”Ooh..nangitu hibak banar ku simpan, ayu kita ka rumah ku,” sahut Ongol.
Napa ada, pina kagirangan Gabau wan Asoy tadi, langsung imbah dari warung nitu, buhannya maumpati Ongol bulik ka rumah. Rasa kada sabar handak manonton film panas jarnya tadi.
Pas sampai rumah Ongol, langsung badua tadi manutup lawan lawang, sagalaan horden di jendela. ”Kanapa buhan kam tutup, kadapai jadinya,” jar Ongol managur buhannya. ”Supaya kadida nang malihati dari luar Ngolai. Kena pambakal mancarii kita,” sahut Asoy.
Rupanya pina kada sabar lagiam Gabau wan Asoy neh, supaya Ongol lakas manyetel film panas nang dimaksud buhannya tadi. Dada pina dagub-dagub pulang, naik darah dapatnya.
Pas disetelakan Ongolai film panas tadi, timbul takajut buhannya. Nang muncul, video nang direkam Ongol. Mana sesekali tahereng hereng pulang, ambilan gambarnya.Isinya pambakal Kampung Liur, alias Haji Untat pas rahatan manyimbur kabakaran lahan. Kena ada jua Gabau lawan Asoy, talihat di video pas rahatan lewat ja.
”Hauu…mananya film panasnya Ngol? Ini lainan..!,” jar Gabau panasaran. Mintu jua wan Asoy, bagaru kapala, pas nang ditonton sakalinya lain fim panas, nang dimaksud buhannya.
”Ini pang film panasnya, kisah pambakal lawan buhan ikam mamajahakan kabakaran lahan. Panas kalo, rasanya. Aku nang manyutingnya ja umpat kapanasan..!,” sahut Ongol.
Napa ada, mandam campur birai muha Gabau wan Asoy dapatnya, langsung badua balurung kaluar dari rumah Ongol, kada pakai permisi lagiam. (gus)
Editor : Agus Jaka Purnama