Kawan Ongol nangarannya si Gabau, Lengkor wan Dangdut tahitung sudah cukup baumur gasan mambina rumah tangga. Tapi buhannya batiga ni masih ja jomblo, alias balum baisi bebibinian lagi nang ditaksir lawan pacangan dijadikan bini.
Hanyar-hanyar tadi, bubuhannya ni dinasihati Haji Untat, supaya tahun ini bisa dapat jodoh.
”Buhan ikam batiga saharusnya cangkal bacari jodoh, supaya dapat nang cucuk. Jadi tahun ini kawa jua tu baramian di palaminan. Ayuha kena aku manyumbang banyu kinumnya,” ujar Haji Untat mamadahi buhannya batiga pas takumpulan di warung Acil Jablay.
”Naa..nitu pang nang masih diusahakan ji ai. Amun kawan bebinian banyak haja pang baisi, tapi lun masih mamilih nang pas dihati,” sahut Gabau.
”Mun ulun ni ji ai, kada tapi wani marayu lagi. Makanya handak balajar nah lawan kakawanan nang sudah babini, supaya kawa bacari jodoh,” ujar Lengkor pulang manyahut.
”Mun ulun ni, gara-gara sibukja ji ai, maka hayal kada tapikir lagi handak babini tahun ini nah,” ujar sahutan Dangdut.
”Naa..nitu pang masalah buhan ikam nih, talalu banyak alasan, makanya ngalih dapat jodoh. Amun memang ada nang pas dihati, cuba ja langsung diparaki. Kalau inya hakun, lamar ja langsung ka urang tuhanya. Soal rajaki jangan dipikirakan, pasti kawa ja buhan ikam hidup kaya urang, imbah sudah barumah tangga nitu. Asal bujur-bujur ja bagawi,” ujar Haji Untat pulang, panjang lebar manasihati buhannya batiga tadi.
Rahatan serius buhannya baampat tadi bakisahan sual, kyapa mambangun rumah tangga. Timbul kujuk-kujuk datang Ongol.
”Naa..aku tahu, pasti nang dikisah ni kada jauh, sual bebinian. Ya kaloo..?!,” ujar Ongol managur langsung menebak.
”Dasar jua ikam ne Ngolai, ngini bakisahan bebinian kadanya sual nang cerobo pang. Ni aku lagi manasihati buhannya ni supaya tahun ini bisa dapat jodoh..!” sahut Haji Untat bamamai.
”Uuh...mintu kah..hehe. Aku baisi saran ja nah gasan buhan ikam mun bacari bini nitu. Supaya hidup buhankam kena nyaman wan tentram,” ujar Ongol manyambung pandiran.
”Haah..napa Ngol nasihat ikam?” sahut Lengkor san Dangdut handak jua tahu.
”Aku saranakan, carilah bini nang kada pintar bacari duit. Nang kaya aku ni nah, bini ku kada tapi pintar bacari duit,” ujar Ongol.
”Hauu..bararti bini ikam kada bisa mambantu pandapatan rumah tangga lah mun kyitu. Pangolerai ngarannya,” sahut Haji Untat.
”Jangan salah ji, justru amun bini pintar bacari duit. Kita nang laki ne kalimpungan, bingung mancari wadah manyimpan duit. Amun bini pintar bacari duit, kamana ja manyimpan duit, pacangan dapatnya mancari..! Disimpan di dalam tilam gin, dapatnya amun kena bini nang pintar bacari duit,” ujar Ongol menjelasakan.
Napa, ada mangalakak tatawaan buhan Gabau, Lengkor wan Dangdut mandangar nang kyitu sakalinya maksud Ongol tadi.
Haji Untat maka tamandam dapatnya. ”Bujur jua jar ikam Ngolai, pantas salawas ini bini ku tahu tarus dimana wadahku manyimpan duit,” garunum Haji Untat sambil bagaru kapala. (gus)
Editor : Agus Jaka Purnama