Belakangan ini warga Kampung Liur pina resah pulang lawan aksi maling kalapa sawit nang mulai manjadi-jadi. Apalagi warga rahatan himung-himungnya, lawan harga sawit yang naikan pulang, imbah sampat turun samingguan nang lalu.
Mandangar harga sawit wayahini naikan pulang, Ongol nang salawas ini marantau ka Ibu Kota Negara (IKN) di Kaltim, akhirnya babulik pulang. Ujar kisah, gawiannya jadi panjaga malam rancak talambat gajihan, lantaran proyeknya kada tapi digawi lagiam.
“Talalu banar bubuhan nang mayuruh ikam bagawi di sana Ngol lah, sampat ikam tautang di warung sabulanan,” ujar Haji Untat bagarunum, pas Ongol mengisahakan pangalamannya bagawi di sana. Badua ni badudukan di pos ronda.
“Iyaam Ji ai, nang kaya malam kyini nah, mulai habis magrib sampai habis subuh isuk, ulun mulai jaga tu pang di sana. Amun pacangan kadida upahnya, kada bahasil, baik ulun bulik kampung, manjaga kampung,” jar Ongol pulang.
“Iih, bujur jua, napa lagi wayahini kampung kita gin pina kada aman sudah Ngol Lai, maling di mana-mana. Makinnya maling sawit. Baik ikam umpat manjaga kabun, ada aja upahnya,” sahut Haji Untat pulang. Sidin ne baisi jua kabun sawit di Kampung Liur.
Kada lawas datang kawalan Ongol nang lain, yakni Gabau lawan Lengkor. “Hau Ngol, lawas ikam kada talihat, ku dangar marantau ka IKN sana?,” jar Gabau batakun. Handap kisah, lalu Ongol bekisah pulang pangalaman pahitnya pas bagawi jaga malam di IKN nitu. Nang akhirnya inya mamutusakan bulik kampung ja lagi.
“Bujuram Ngol, baik bagawi di Kampung saurang. Banyak haja tu gawian di sini. Mana kada aman lagi kampung kita neh, musim maling Ngo lai,” sahut Lengkor pulang.
“Nang kyapaam lagi amun sudah kyini kaadaannya, handak minta bela lawan siapa pulang kita nang rakyat biasa ngini. Kita jaga kampung kita ja, nyaman kada dimasuki maling. Napa lagi banyak jua nang batanam sawit segalaan beisi walet di wadah kita neh. Baharap lawan patugas, kada kawa jua mahaga maling, lantaran sudah kabanyakan gawiannya,” jar Haji Untat pulang, mambahas.
Makin rami bakisahan, malam samakin larut. Cuaca pina meembun. Untungnya di pos ronda nitu sudah disediakan Haji Untat kopi lawan segalaan wadai, gasan bubuhan Ongol bejagaan.
Timbul Ongol ne badiri, pina besemangat. “Pokoknya ulun siap maamanakan kampung dari sagala gangguan kaamanan. Apalagi baya maling ja, ulun lincai tu pang lawan pangkungan ne,” ujarnya pina nahap, batajak pangaruh, sementang beisi pengalaman jaga malam di proyek IKN.
Sekalinya imbah itu tangan manjumput lawan cirat, lalu manuang kupi wan manjumput gumbili bajarang.
“Apa garang nang ikam baisi Ngol, maka wani malincai maling di kampung kita neh,” ujar Anang Gabau marasa tapanasi.
“Haww..aku ne biasa marantau salajur baguru. Ya paling kada adahaja lah dua tiga jurus andalan ku gasan malumpuhakan maling,” sahut Ongol.
“Sudah-sudah, dari pada buhan ikam batangkar, ada baiknya bubuhan ikam sama-sama awas manjaga kampung ne, jangan handak harat masing-masing. Jaga kakumpakan,” ujar Haji Untat manuhai, managur Ongol wan Gabau.
Rupanya Haji Untat tadi, handak bulik badahulu, lantaran sudah faktor usia, jadi sidin kada kawa lawas takana angin malam.
Kanapakah pas rahatan sidin hanyar ampat langkah maninggalakan pos, timbul garabakan buhannya betiga tadi. Bediri semuaan, sambil nang kaya urang mangaluarakan jurus.
“Haw..haww..kanapa neh..! apa nginii...! ujar Ongol basuara surangan. Gabau umpat jua badiri basiap lawan jurus, sampai tanganga Haji Untat kadi jadi bulik malihat buhannya galabakan kyitu.
“Kuurrr..samangat...kuurrr samangat,” ujar Lengkor pulang.
Sakalinya, pas rahatan asik bakisah tadi. Ongol ni takalipik, takibar samangatnya akibat ada cacak nang gugur masuk kadalam bajunya. Lalu cacak nitu, bajalan dalam awaknya sampai ka dalam tapihnya. Makanya inya sampai galabakan badiri, sampai tasipaknya cangkir banyu kupi inya surang.
Malihat nang kyitu, lucut tatawaan Haji Untat manampalaki, Gabau lawan Lengkor tatawaan jua. “Pina harat sagalaan baisi jurus, wani maamanakan kampung dari maling, sakali diguguri cacak nang halus ngitu ja sampai takalipik, takibar samangat. Tabalik cangkir ikam sepak..hahaha,” ujar sidin.
Napa ada, birai muha Ongol, sambil malihati cacak saikung mangaluyur bukah, pas tagugur dari dalam tapihnya. (gus)
Editor : Agus Jaka Purnama